الستر يا ربنا

زمان
ييجى كده من 10 سنين
أو يمكن من عشر تلاف
كان فيه ولد شاف بنت
فحمد ربه على نعمة البصر
و بعدين يمكن بعد 10 سنين
أو يمكن ألف
ولد شاف بنت
فعرف هو ليه أتخلق
.................................
و فى الحالتين كان فيه ملاك فى السما
فطس على روحه من الضحك
أصل البنت دى بقالها زمان بتعدى فى نفس الساعة من نفس المكان
و برضه الولد بقاله زمان بيعدى فى نفس الساعه من ذات المكان
و النهارده أول مره يعرفوا إن التانى موجود

و إنهار فى البكا الملاك و إستغفر ربنا
لما عرف إن اللحظة دى
هى بداية عذاب الولد
أصل الصدفه من غير حكمة ربنا
تبقى عبث
و العذاب من غير إرادة ربنا
يبقى ظلم
و كمان تحول العينين من رمزين للنبوة
لطاقتين جهنم
لازمله أله يمسخه
لكن الأهم إن شفا الولد لو بدون تدخل ربنا
لا هيكون ولا هيتكتب


زمان و بعدين

كل ولد بيحب بنت
ياخد باله إنه مابين أيدين ربنا
لا يقبضهم عليه
لا تحبه و يكون ربنا بالستر أمر
حسن فواز
6/7/2006

شاب خجول يحاول ان يحب

أذيتك
مشتاق لعتابك
احاول جاهداً لفت إنتباهك
فأتجاهلك عنداً و كبراً
علكى تلتفتى او حتى تتمنين عراكى

المحك تمرين فوق أكتافى
تتمايلين بجسد ممنوع محرم
ولا أملك نكرانك
فهل تعلمين؟
و بلوغى حد الإيمان بك يفتننى
فهل تدركين؟
أو حتى تلاحظين وجود عيناى
تلك اللاتى تقبعان و كأنهما على ظهرك مرسومتان
إنها أنا
ذلك المنتظر فى موانىء ذهابك و عودتك
الجالس ، الناظر فى إستحياء لكعوب أقدامك
و كأننى أرفض رؤيتك
ألاحظ وجهك و انت تتكلمين ، تضحكين
أو حتى تهتمى بألوان الحوائط
أشعر بأنفاسك ريحاً تحرك أحبال صوتى
بكلمة أرددها لنفسى
علها يوماً تتحرر و تصل إليكى
كصلاة المظلوم
كأمنية الطاهر

فهل تتجاهلين مثلى؟
و مثلى يٌقدم و يٌحاول
و مثلى يٌلقى نظرةً بلا حياء
يحرك لسانه ، علكى تضحكين او تعبسين
من كلمة كنظرة حنين
و أنتِ بالله عليكى
لو أدركتى ؟
أكنت تٌصرحين ؟
________

أحبك
يا أمنية فى القلب
تصرخين

حسن فواز
9/7/2001

بنتكسف

هو أحنا ليه بنتكسف
و يحمر وشنا و نترعش
و نحس إن الأيدين لو لمست الأيدين هتتحرق
و نهرب بالعينين لا نتكشف
و نوطى راسنا
و نهز في رجلينا
و ينطق لسانا بكلام عبيط و الغريب إنه يتفهم
و بيتفهم إننا مكسوفين
و مهما كبرنا لسه على الحب صغيرين
و نضحك من قلوبنا لما نفتكر
و نحس بعبطنا و قلة حيلتنا ساعة اللقا
و نوعد نفسنا اننا في المرة الجايه مش هنتكسف
و لكن بنرجع تاني برضه نتكسف
و تحمر وشوشنا
و يترعش صوتنا
و ندلدل روسنا
و يتولد حب صغير من لحظة كسوفنا
و مع كل كسفه يزيد حبنا
و كل ما نقاوم كسوفنا يزيد حبنا
و نبتدى مع الالفه نتعود على بعض
و نرجع نحكي عن كسوفنا زمان
و نغذي وجودنا بسوابق لحظات كسوف حبنا
و نكتشف ان احنا لسه برضه مش عارفين كنا ليه بنتكسف
لكن مش مهم طالما لسه في حبنا بنبتدي

حسن فواز

15/7/2007

سؤال عن حب

لما بيسألني الناس عن حبك اللى مات من زمان
بحتار
و الحيره مش في الإجابة
الحيره في أزاي أقولهم أنه مات
أصل الكلام ساعات مايشيلش كل المعاني
و ساعات بنبقى عايزين كلام جديد يعبر عننا
وساعات اكتر بنبقى عايزين نخترع كلام جديد لأحاسيسنا
أصله كان غريب قوى سرعة موت حبنا
زي ما كان غريب برضه سرعه ميلاده
و دلوقتى لما ببص في عينيكي
بلاقيكى بتدوري على بقايا حبيبك اللى كان زمان
مرة تلاقي كلمه او إنفعال قدام
تفرحي
و كتير بتلاقي واحد تاني قدامك
مش احسن ولا أسوء
المهم انه واحد تاني
كل ما تقربي منه عشان تصاحبيه
تفتكري انه شبه اللى كنتي بتحبيه
تهربي
وتقعدي هناك بعيد
تلمحيه بترف عينيك
تتفرجي عليه
يا عزيزتي بستأذنك تبطلي تدوري
لاحسن بالصدفه تحبي اللى قدامك دلوقتي
و نرجع تاني مانعرفش نجاوب لما نتسئل عن الحب الجديد اللى اتولد

حسن فواز

14/7/2007

أنا

بلغني أنك حبيتي
و بلغك أنى لسه بحبك
فمهمكيش
و سديتى ودانك بكلام حبه
و لخمتي عينيكى بصورته
و مليتي أيديكى بأيديه
فهمني و ضايقني و بكاني
عارفه لما تحسي إن قلبك بيصغر و يضيق
و نفسك بيقصر و يجرحك وجوده
عارفه
لما البكا مايبقاش متاح
و دموعك زى الفيضان لما يمنعه سد أسمه الكرامة
و الناس لا هي معاك ولا هي ضدك
صعبان عليها و مستهيفاك
حبي ليكى أصله كان زى الحديد
و كل ما النار أنتي بتزوديها
بياخد شكل جديد
لكنه ما يتقلبش أيداً نحاس
بيفضل أسمه حب
و أنتي لسه ما بيهمكيش
____________________
بلغني أنك في حضنه
و بلغك أنى أتمنيت يموت
ففرحتي بنفسك
و زينتي وشك بابتسامه
و ضمتيه جنبك زيادة
و نطقتى أسمه بدلع
فزلنى و خنقني و ألمنى
و عرفت
إنك ورا الحجاب
بتخبى سلك مسموم
و ما بين الشفا يف
علقم
و جوه أيديكى
شوك
و من عينيكى
بيطل الموت
و اللي يحبك
ملعون
ملعون أبوكى بنت كلب
ملعون أنا و ملعون اللي خلاني أحبك
قلبك كان معروض في سوق للعربجيه
إشتراه أبو أحلى عربيه
غبي أهبل جبان
مايهمكيش
السوق قانونه ثابت
و أنتي معروضة
و انا مش تاجر
أنا حتة شاعر
القمر عندى مابيلفش حوالين الأرض
و الزرع عندى مش لملى البطن
حتى انتى مش جراب للعيال
لكننا بنختار لا نكون بشر
لا نكون زيك حته أداه
_____________________
نفسى يبلغنى أنه بلغك انى كرهتك
و كرهت أسمك
نفسى يبلغك إن الفرق بينك و بين الضلمه عندى مش واضح
أنك طفيتى النور اللى جواكى و بقيتى كهف مليان زباله
إنك خسرتى إحساس كلمتين
بحبك
و عايزك
نفسى تفهمى
مش هيعرف و لو إستعان بوحى الأنبياء كلهم
أنه يقول كلمه زى اللى عجبوكى منى
مش هيعرف و لو أستخدم كل أساليب لمسك
أنه يلمسك اللمسه اللى اتمنتيها منى
مش هيعرف و لو غير جيناته كلها
انه يجيب منك عيال محبوبين زى عيالنا
نفسى يبلغك أنه بلغنى
أنه شبهى ساعات
لأنك فى النهايه هتعرفى انى عرفت
أنك أخدتى منى نسخه بايظه
ولا أقولك
عنك ما عرفتى
أصل اللى ماتوا جوانا مش انا و انتى
إنما انتى بس
انا هاعيش رغم عنك للأبد
جواكى
أنا اللى حسسك بقيمة رجليكى
مش بس تمشى عليهم
انما يحبهم أنا
انا اللى خلاكى تعرفى أزاى تمثلى الحب
لأنك مش هتحبى زى حبك ليه أنا
انا الهوا اللى حواليكى
أنا الأسم المجهول فى كل الأغانى
أنا الأولانى
أنا الأسم اللى مش هتديه لعيالك أبداً
انا اللى هتشوفينى من بعيد فتقلقى
أنا اللى صورتى هتتمنع من دخول بيتك
أنا اللى فرحك محضرتوش
انا اللى هتحاولى تخليه شبهى
أنا اللى هفضل هنا
و انتى اللى هتفضلى ولا حاجه من غيرى
صدقينى
سبب وجودك فى الدنيا كان علشان تتصورى جنبى
و سبب وجودى فى الدنيا
هيكون إنك تندمى على خروجك من الصورة
أوعدك
حسن فواز
9/7/2006

حالة حب

شجرة توت بتطرح طريق حرير يوصل ما بين عينيكى و قلبى
يدخلوا
أقفل عليهم
و أحبك

فتتزرع لبلابة
اتشعبط عليها ، و أوصل لقلبك
ألأقيه ضيق
مايسعش غيرى
تحبينى
بس لسه قدامنا طريق
مليان
بنظرة واحدة منك
و الف قصيدة منى

و يا ريت ننتهى
قبل ما دليل الحب بينا يتحول لحمامة سلام
و قبل ما زمان الحب يبقى لحظة جهاد
___________________
و اكتفى بإن عقلى
حدد
لون عينيكى
رسمة شفايفك
و قلبى يحبك
يحبك

حسن فواز
13/2/1999

البحور الشعرية

شوفوا بقى خليكوا معايا.
هتعدي علينا كام كلمة كده لازم نكون متفقين على معناها عشان نفهم بعض.
أول كلمة حرف متحرك: حرف متحرك ديه معناها الحرف أللي عليه حركه و الحركات هي الفتح و الكسر و الضم،
زي مثلاً زَرَعَ الثلاث حروف عليهم فتح يبقى التلاتة متحركين، أو مثلاً (وَ مَا) الحرفين أللي في الأول عليهم فتح يعني متحركين و الحرف الأخير ما علهوش حركة.
ثاني كلمة الحرف الساكن: اللي هو الحرف أللي ماعلهوش حركة من الحركات اللي قلناها من شوية.

هل أنت محتاج تكون دارس نحو عشان تعرف الساكن و المتحرك؟ للأسف لأ ، ليه؟ لأن النحو جواه إعراب و الإعراب هو حركة أخر حرف في الكلمة بس، مش الكلمة كلها.
أمال بنعرف منين إذا كان الحرف أللي في نص الكلمة متحرك أو ساكن؟ ده بقى يا أساتذه من النطق، زي ما بينطق في الأغلب ده أللي بيحدد إذا كان ساكن أو متحرك.

و هنرمز للحرف المتحرك بعلامة سالب (-)
و للحرف الساكن بعلامة موجب (+)

حلو كده؟ أللي عنده أسئلة في الجزء ده يبعت يا رجالة و يا آنسات

نيجي بقى للبحور، البحر الشعري زي ما قلنا قبل كده بيتكون من إيقاع، موسيقا بقى، بيكون الإيقاع ترتيب الحروف الساكنة و المتحركة جواه.
أشمعنى الحروف؟ لأنها أقل وحدة صوت جوه الكلام، يعني ماعندناش نص حرف نقيس عليه.
و الموسيقا في النهاية بتتكون من الأصوات.
طيب البحر الشعري ده بيتقال عليه جمل تانية زي (الوزن، و التفعيلة)
الوزن لأنه شطرين نص يمين و نص شمال يعني، ده في أصله العربي القديم، و فضل المصطلح على كده أسمه الوزن لغاية ما ظهر شعراء زي نازك الملائكة و بقى فيه ابتعاد عن الشعر العمودي أبو نصين ده، و ظهر شعر من غير شطور و أتحول الاسم من الوزن للتفعيلة.
أشمعنى تفعيلة
لما تدرسوا صرف هاتقابلوا التفعيل ده كتير، و التفعيل ده هو أننا نحط الفعل في صيغة، أكنها معادلة يعني و نبقى نعوض أحنا فيها براحتنا بعدين.
فنقول مثلاً إن صيغة (أفعل) تأتي للتفضيل، أزاي؟ نجيب أي فعل مثلاً (ذكي) يتكون من ثلاث حروف أهوه ، لما أحطه في صيغة أفعل يبقى (أذكى)، على أساس إن (فعل) و هيه الأساس بتقابل حروف(ذكي) يبقى الإضافة هي الألف يبقى أي فعل أرجعه لأصله الثلاثي و أحط قبله حرف ألف، يتحول إلى صيغة التفضيل-(زي أنا أذكى أخواتي مثلاً) ولكل قاعدة استثناءات.
ده أصل كلمة تفعيلة، لكن في وزن الشعر مش ده أللي نقصده أحنا بس بنستخدم صيغة التفعيل لأنها الصيغة المجردة الأشهر عشان نحفظ بيها شكل البحر.
ننقل بقى على التفعيلات الخاصة بموسيقا الشعر العربي.
كل بحر بيتكون من مجموعة من التفعيلات المتتالية، و هذا الترتيب بعينه هو البحر الشعري، و أي تغيير في الترتيب يغير أو يلغي البحر، يعني يبقى الشعر غالبًا مش موزون.
التفعيلات ديه ثابته، يعني هتعدي علينا هيه هيه كذا مرة لكن بترتيب مختلف كل مرة.
الخليل بن أحمد قسم التفاعيل إلى نوعين خماسية و جواها تفعيلتين و سباعية وجواها ست تفعيلات، لكنه بعد كده حط صور متغيرة للتفعيلات يعني استثناءات طالعة من قلب التفعيل الخماسية و السباعية، و الاستثناءات ديه وصلت لثماني أنواع بمحصلة 39 تفعيلة كمان.
نرجع تاني نقول إن التفعيلة هي مجرد ترتيب لحروف متحركة و ساكنة لكنها أتعملت عشان تسهل الحفظ،( تخيلوا، هما كده و قال أيه بيسهلوا الحفظ و جايين تلوموني أنا؟)
المهم
نقول التفعيلات:
1) تفعيلات خماسية:
أ) (فعولن) متكونة من خمس حروف ولما نيجي نقسمها لمتحرك و ساكن بتكون على الشكل ده(- - + - +) يعني أول حرفين متحركين و الثالث ساكن و الرابع متحرك و الخامس ساكن.
** و الاستثناءات اللي طالعه من عبايتها هي:
(فعول) ( - - + -)
(فعو) ( - - +)
(فًعِلْ) ( - - +)
(فع) (- +)
ب) (فاعلن) متكونه من أيه؟ خمس حروف برضه مش خماسية؟، و لما نيجي نقسمها لساكن و متحرك بتكون على الشكل ده (- + - - +) أول حرف متحرك و الثاني ساكن و الثالث و الرابع متحرك و الأخير ساكن.
**والاستثناءات أللي طالعه من عبايتها هي:
(فًعِلـُن) ( - - - +)
(فاعل) (- + - +)
(فَعْلنُ) ( - + - +) لاحظوا إن الحركات أللي على التفعيلة ديه غيرتها عن أختها أللي في أول الاستثناءات.
هتقولي أديني مثل؟ هقولك إن مش ضروري يكون الخمس حروف كلمة واحدة، نعم ، أزاي؟ يعني يا سيدى ممكن يتكونوا من فعل ثلاثي و حرف جر مثلاً ده كمان ممكن تكون متكونة من حرف عطف و حرف إشارة و جزء من كلمة، المهم بقى الترتيب العام للمتحرك و الساكن في الشطر الواحد.

عندنا كمان تفعيلات سباعية زي:
أ) (مفاعيلن) (- - + - + - +)
** و أستثناءاتها هي:
(مفاعلن) ( - - + - - +)
(مفاعيل) ( - - + - + -)
(مفاعي) ( - - + - +)

ب) (فاعلاتن) (- + - - + - +)
** و استثناءاتها هي:
(فَعِلاتن) (- - - + - +)
(فاعلاتُ) (- + - - + -)
(فعلاتُ) ( - - - + - )
(فالاتن) ( - + - + - +)
(فعلتن) ( - - - - +)
ج) (مستفعلن) ( - + - + - - + )
** و استثناءاتها هي:
(متفعلن) ( - - + - - +)
(مستفعل) ( - + - + - +)
( مستعلن) ( - + - - - +)
(متفعل) ( - - + - +)
(مستفعلان) ( - + - + - - + +)
(مُتَعِلُُن) ( - - - - +)
د) (مفاعلتن) (- - + - - - +)
** وليها استثناء واحد هو:
( مفاعلْتن) بلام ساكنه( - - + - + - +)
هـ) (متفاعلن) (- - - + - - +)
** و استثناءاتها هي:
( متفاعلن) بتاء ساكنة ( - + - + - - +)
(مُتَفَا) ( - - - +)
(متفاعل) ( - - - + - +)
(متفاعلاتن) ( - - - + - - + - +)
(متفاعلان) ( - - - + - - + +)
و) (مفعولات) (- + - + - + -) و ده الوحيد من التفعيلات الأصلية اللي أخره متحرك.
** و استثناءاته هي:
(مفعلاتُ) ( - + - - + -)
(مفعولاتْ) ( - + - + - + +)
(مفعولان) ( - + - + - + + )
طيب الكلام ده بقى نعمل بيه أيه أو بيستعملوه أزاي؟
عشان الأول نتعامل مع أللي فهمناه هنقول بس تفعيلة بحر أسمه الطويل و في الجاي لو أبتديتوا تسألوا هنشرح البحر الطويل بالكامل.
بحر الطويل هو:
فعولن مفاعيلن فعولن مفاعلن فعولن مفاعيلن فعولن مفاعيلن
و حروفه المتحركة و الساكنة كالتالي:
( - - + - + - - + - + - + - - + - + - - + - - + ) ده الشطر الأول
( - - + - + - - + - + - + - - + - + - - + - + - + ) ده الشطر الثاني

نعمل مسابقة بقى:
بحر البسيط تفعيلته كالتالي:
مستفعلن فاعلن مستفعلن فَعِلـُن مستفعل فاعلن مستفعلن فََََََعِلـُن
حوله إلى حروف متحركة و ساكنة كما جاء بمثال بحر الطويل بأعلى.

شوفتوا بقى موضوع الموسيقا سهل أزاي، أللي هايقول بعد كده إن تعريف الشعر كلام موزون مقفى يستحمل موزون بقى.

حسن فواز
12/6/2007