إحساس جديد

تخطفك الدهشة لبعيد
ترجعك محمل بشيء و شويات
إشى إنبهار
على حنية
على إنبساط
و فى وسط الهلومة ديه تلاقى إحساس بالأبوة فى الإنتظار
يدفعك لرفض النوم
عينيك فى وسط راسك
بتستنى
.
.
أول صوت
.
أول بسمة
.
.لحظة ما تمد إيدك تستقبل فى أحضانك سبب جديد لاستمرارك فى الحياة
تتمطع الدنيا و تفرد صوابعها لاخر ما تقدر
تكبش و تديك قلب جديد
اسم مختلف
تمنحك أقدم كنز فى التاريخ
إحساس جديد
.
.
و تبدأ العينين فى الدوران لاهي شايفه ولا أنت قادر تحبس دموعك
تتخيل إن النظرة ديه ليك وتتوهم إن الإبتسام بسببك
تضحك لأول مرة من قلبك
من غير سبب
تضحك و فى عينيك دمعة صغيرة
أصغر من المحبة إللى بين إيديك
.
.
يختلف اليوم من يوم ليوم
مرة يشبهك و مرة يحبسك
لأنت قادر على الخروج و لا بتتمناه
حبيس القلب الصغير
و سجانك أحب خلق الله لقلبك
.
.
لا هو إحساس متواصل ولا هو بينقطع
و تتغير معانى الكلمات و القاموس فى دماغك ينكسر
حتى الأحلام تبستم و الكوابيس ماتكتملش
قادر أنت على وقف كل الشر أو على الأقل مش هاتخليه ينتصر
حكاويك لازم تبدلها
و جغرافيا بيتك هاتختلف
حتى الأسامى غيرتها و وصف الناس هاتهذبه
يا أخرة عهدك بنفسك
يا أول يوم فى محل اللعب
.
.
قصيدة مش هاتنتهي
كل يوم مقطع و كل ساعة تجربة
قصيدة هي بداية الأعمال الكاملة
قصيدة لأول مرة بتتمنى موتك قبل ما ينكتب فيها السطر الاخير
يا قصيدة ماتنتهيش
و أكبرى
كتري فيكي المعانى
و إلهمى الكون كله يكتبك
يا قصيدة أهم من مؤلفها
و سبب وجوده الوحيد
يا قصيدة كل يوم بتهديني
إحساس جديد



حسن أبو الوفا فواز
21/8/2011