الستر يا ربنا
زمان
ييجى كده من 10 سنين
أو يمكن من عشر تلاف
كان فيه ولد شاف بنت
فحمد ربه على نعمة البصر
و بعدين يمكن بعد 10 سنين
أو يمكن ألف
ولد شاف بنت
فعرف هو ليه أتخلق
.................................
و فى الحالتين كان فيه ملاك فى السما
فطس على روحه من الضحك
أصل البنت دى بقالها زمان بتعدى فى نفس الساعة من نفس المكان
و برضه الولد بقاله زمان بيعدى فى نفس الساعه من ذات المكان
و النهارده أول مره يعرفوا إن التانى موجود
و إنهار فى البكا الملاك و إستغفر ربنا
لما عرف إن اللحظة دى
هى بداية عذاب الولد
أصل الصدفه من غير حكمة ربنا
تبقى عبث
و العذاب من غير إرادة ربنا
يبقى ظلم
و كمان تحول العينين من رمزين للنبوة
لطاقتين جهنم
لازمله أله يمسخه
لكن الأهم إن شفا الولد لو بدون تدخل ربنا
لا هيكون ولا هيتكتب
زمان و بعدين
كل ولد بيحب بنت
ياخد باله إنه مابين أيدين ربنا
لا يقبضهم عليه
لا تحبه و يكون ربنا بالستر أمر
حسن فواز
6/7/2006
1 Comments:
الوووو
اولا شكرا على زيارتكم و يسعدنا تشريفكم الدائم لمدونتنا المتواضعة...
ثانياً..انا موش بنفضلك يا استاذ انا معرفلكشى تليفون و مبتخشش على الماسنجر نهائيا سعادتك....
ثالثا ...وحشنى مووووووووووت و نفسى اشوفك و نقعد ندردش و نحكى انشالله فى اركاديا ...
رابعا انا فى غيابت الجب دلوقتى قصدى فى غايبات الخرطوم...محشور فى فوم الخرطوم و موش عارف هخرج منه على امتى بس ممكن اخرج منه اجازة على العيد الكبير لمدة اسبوعين بالقاهرة و اكيد نتقابل فى حينها و حتى ذلك الحين ابعتلى رقم تليفونك على الماسنجر و نتواصل بالتعليقات يا معلم
اخيرا...مدونتك ظريفة قوى و شكرا انك ضيفتلى لينك عندك
إرسال تعليق
<< Home