بتوحشيني يا مصر

بتوحشيني يا مصر

بتوحشيني يا مصر
بتوحشيني كل ما اشوف الزحمة والطوابير والزبالة
بتوحشيني مع كل شتيمة وسب دين في شوارعك
ولما ببعد قوي فلاقي الشوارع وسخة
والميه وسخة
والسما وسخة

بتوحشيني يا مصر
الصبح بدري والناس مخنوقة
والضهر والناس مقهورة
والعصر والناس هلكانة
وباقي اليوم والناس سكرانة

بتوحشيني
مع كل دقن منحت الحق لصاحبها يبقى ابن خالة ربنا
مع كل شعر طويل ادى لصاحبه اسم فنان
مع كل عربية قسط نقلت إللي راكبها من حيوان لإنسان

بتوحشيني
وأنا على ناصية شارع في عين حلوان
قدامي جبل زبالة
ورايا أرض زبالة
وسطها قصر ثقافة

بتوحشيني
طول ما أنا سايب نفسي أعيش جواكي
وبستمتع لما أقابلك في كتاب تاريخ
أو في خطبة رنانة

بتوحشيني يا مصر
وخايف أموت من غير ما اشوفك

حسن فواز
31/10/2009