الميدان
الميدان
عدى يوم على الميدان
افتح إيديك للمطر
و استقبل فى قلبك طهارة الهتاف
بشرخ الصوت ينطلق
و بحدة الصخر يوجعك
أغسل عينيك بوشوش الأبرياء
و أكتشف فيهم خريطة الوطن
كرم أيديك بالطبطبه على كتافهم
و اوعى تدمع لما واحد منهم يشكرك
قدس جسمك بحقهم فى تفتيشك
سلم على البوابات كل الممنوعات
خوفك، شكك، تاريخك
و أبتدى من دخولك اكتب مستقبلك
عدى يوم على الميدان
و أشهد مع الشهداء
و اتكلم مع الصاحيين
شاهد على جباههم كل اللافتات
و اخرج –لو نفسك طاوعتك-
أنقل رؤيتك
انقل طواف الحمام فى السما
حماس الطوب على الأرض
نضافة الهواء
حنية النجيل
عدى يوم على الميدان
عشان تستحق غنوتك
عدى بس عشان تكتشف
أنك فى الزحمة بيبقى لصوتك رنة الانبياء
عدى يا صديقى على الميدان
و ماتسمحش لحد براه إنه يعدي عليك
ماتسمحش للتاريخ إنه يهجرك
حضر إجابتك لولادك على السؤال
"كنت فين لما الوحى نزل"
مهما حاولت تبين ساعتها بطولتك و صحة رؤيتك
هتشوف فى عيونهم نفس السؤال
"و ليه ماعدتش يوم على الميدان"
حسن فواز
6 فبراير 2011
posted by hassan fawaz @ ٥:١٠ م
0 comments
