بنقرب رغم البعد

من بعيد ...كنا سوا
و اللى ما بينا من مسافات و بشر يكتر
فيقربنا أكتر
الصوت يزعق مع إنه محبوس
و الأيدين تتمد و فيها القيود
نلمس بعضنا بالعيون
نصرخ : بنحب
يصرخ العفاريت بأصوات من غير معاني
تخبي كلامنا، تحرفه.... تدفنه
يتشقلب في ودان الناس
ينضموا للعفاريت ضدنا
كل ما نقرب
يبتدي الطبل و التنطيط
يستعين الناس بالسحر و الشعوذه
عفاريت تلبس زيها
و منهم اللى يقلد مشيتي
نتوه عن بعض
لكن دليلنا في قلبنا يرجعنا
و أصرخ : قربي .. بحبك
تهب النار من حواليا
تنادي : قرب .... بحبك
تخفيها الجبال عن عيوني
و تزيد العفاريت و تملى الأماكن
و يكتروا الأشباه
و تزيد توهتنا ساعات
سنين تعدي و الشعر بيشيب
لا بنوصل ولا العفاريت بتتهد
و الونس يجيلنا من صدى كلامنا لبعض
كتر المحاولة يصبرنا
حسن فواز
13/2/2008